Жителите на Тресонче биле православни верници уште од најраните денови на населувањето на Мијаците на планината Бистра. Близината на манастирот “Свети Јован Бигорски” отсекогаш вршел големо влијание врз воцрковувањето на жителите од Мала Река, а преку тој манастир Мијаците развивале и директни врски со светогорските манастири на Атос, а особено со манастирот “Зограв“ (“Свети Ѓорѓи”), каде во минатото се замонашувале голем број Мијаци и Македонци воопшто.

Тресонче е село од каде се родиле и сe уште се раѓаат уметници, зографи, копаничари, свештеници, монаси, ќеаи, сточари, министри, академици, ѕидари, дервенџии и градоначалници, село на над 50 лекари, доктори на науки, магистри, книжевници, филолози, новинари, писатели, комунисти и демократи, значајни архитекти, правници, економисти, учители, војводи и војвотки, село на амбасадори, конзули и трговци.

Тресонечките шуми се дел од националниот парк Маврово. Тој парк зазема простор од 73.088 хектари и најголем е од веќе прогласените национални паркови во Македонија. Во околината на Тресонче паркот ги зафаќа западните и централните делови на Бистра.