Христос воскресна од мртвите, со смртта смртта ја победи, и на оние во гробовите, живот им подари!

На ден 01.05.2021, на наше големо радување, по повеќе декади, црковниот одбор на село Тресонче организираше литургија со литија по повод Христовото Воскресение – Велигден.

Во сепразничната и спасителна ноќ, која ни го навестува Празникот над празниците и победата на Животот над смртта, во нашиот соборен храм Св. Апостоли Петар и Павле беше објавено Христовото Воскресение, по што беа отслужени Свети Божествени Златоустови Литургии, на кои верниците се причестија со Светите Христови Тајни. Со прекрасната и незаборавна богослужба чиноначалствуваше отец Благоја Спировски.

Црковниот одбор на Тресонче изрази големо задоволство и благодарност до сите верници од Тресонче и соседните села кои земаа учество и присуствуваа на светиот чин,  посебно најмладите членови, како и оние кои несебично се вложија во подготивките на истото.

Од одборот известуваат дека интенцијата е овој свет настан да прерасне во една убава традиција на одбележување на најголемиот христијански празник со што ќе заживее селото и црквата за овие празнични денови.