Тресонче  Недела 27ми Септември 2020г.

Автор: Жан Илиќ

Денес во нашето Тресонче за прв пат успешно се одржа трката за Државното Првенство на Македонија во Планински Велосипедизам  „ХСО Тресонче 2020“.

Трката се возеше по кружна патека долга 3.2км  трасирана во атарот на Тресонче и поминуваше низ сите негови маала. Стартно-целната линија беше на Леништа. Патеката е со Олимписка Квалификација и ги има сите атрибути на професионална ХСО МТБ патека за Ранг Листа.

На државното Првенство учествуваа 56 натпреварувачи од сите професионални македонски велосипедски клубови и помина во најдобар ред на општо задоволство на учесниците и присутната публика.  Натпреварувачите   беа поделени по  категоризацијата на Велосипедската Федерација на Македонија (ВФМ) и тоа во 6 категории, и соодветно во нив беа прогласени државните прваци за оваа 2020 година  и беа доделени медалите на победниците во сите пропишани категории.

Организатор и домаќин беше нашето Здружение на Граѓани „Брзовец“, со стручно-спортска асистенција од Велосипедскиот Клуб „Енерџи“ и ВФМ .

Во согласност со препораките на Министерството за Здравство трката беше спроведена според Протоколот за Спроведување Превентивни Мерки за Заштита од „Ковид-19“ при организација на велосипедски натпревари.

Со оваа извонредна  организација на овој настан од голема спортска важност , како и со минатогодишната  редовна трка за Ранг Листа на 31.08.2019г , Тресонче веќе е  стандардна локација со патека  на Годишниот Календар на Натпревари на ВФМ.

Ова е голема чест но и обврска за Тресончани кои предводени од З.Г. „Брзовец“ веќе се на високо место во велосипедизмот во нашата држава. Искуствата и рутината  од организацијата на велосипедските маратони по Биста кои се одржуваа минатите години ,како и професионалните трки последниве две години , веќе даваат резултати .

За велосипедските патеки на Тресонче веќе се слуша низ целата држава, учесниците ги прераскажуваат .

Овие активности со сигурност не водат кон целта ,  Тресонче во иднина дефинитивно да се востанови како најголем и највреден центар на велосипедизмот во Македонија . Тоа му го овозможуваат прекрасните терени кои се идеални за таа намена, прекрасната и еколошка средина и несекојдневната убавина на природата која ги освои срцата на натпреварувачите, рекреативците и сите љубители на овој прекрасен спорт.

Планинскиот масив на Бистра Планина со својата питома конфигурација и блага клима и со Тресонче лоцирано во средината на целиот планински масив , како и во центарот на Националниот Парк Маврово, тоа и му го овозможува.

Главната движечка сила е неуморната екипа на  З.Г. „Брзовец“ која  со години волонтерски вложува многу труд и напори  и конечно успева саканото Тресонче  да го стави на врвот во овој рапидно растечки спорт во нашата држава.

Насмевката на изморените лица на учесниците на маратоните и трките кои со љубов ги организираме  , се нашата најголема награда.