Почитувани Тресончани, сопственици на имот и љубители на нашето село,

Сакаме да ве информираме дека на последниот состанок на Извршниот одбор на Здружението на граѓани „Брзовец“, по детална анализа на состојбите и трошоците, донесена е неопходна одлука за корекција на износот на годишниот придонес за вода и комунални услуги со цел да се обезбеди континуитет во одржувањето на комуналниот ред и функционалноста на водоводниот систем во Тресонче.

Оваа одлука не е донесена лесно, но е единствениот начин да обезбедиме непречено функционирање на селото, чиста вода и уредена околина за сите нас.

Зошто е потребна оваа промена?

Износот на придонесот не е променет од самото воспоставување на водоводот. Во меѓувреме, економската реалност е драстично променета. Главните причини за оваа корекција се:

• Драстично покачување на комуналните услуги, особено трошокот за подигање/празнење смет – 1.000 денари по контејнер. Практично, само за отпад – 10 контејнери = 10.000 денари, се празнат 4 пати годишно поради неодговорното одлагање на шут и кабаст отпад;

• Повеќектратно се зголемени трошоците за делови, репроматеријали и тековни интервенции за одржување на водоводот (вентили, спојки, цевки, поправки по дефекти, сезонски интервенции и сл.). Водоводот е жив систем кој активно се одржува;

• Инфлација и раст на цените на услуги и материјали;

• Нередовно подмирување на обврските од страна на дел од граѓаните и сопствениците на имот;

• Потреба од минимален фонд за итни поправки и непланирани дефекти, за да се реагира навремено без прекини во снабдувањето;

• Одржување на заедничките јавни површини и инфраструктура (чистење, ситни поправки, логистика);

Нови износи

Одлуката ги предвидува следните ставки:

• Комуналии: 1.000 денари

• Комуналии + вода: 1.900 денари

• Членови со членарина во З.Г. „Брзовец“: 2.500 денари

Напомена: Износот 1.900 денари (комуналии + вода) изнесува приближно 158 денари месечно, што е симболичен износ во однос на реалните трошоци. Поради тоа, недолично е и неодговорно доколку некој се обиде да го заобиколи како обврска, бидејќи товарот потоа паѓа на оние што редовно плаќаат.

Инструкции за плаќање

Ве молиме вашите обврски за тековната година да ги подмирите најдоцна до 31.04.2026, со цел навремена подготовка на системот за претстојната летна сезона.

• Жиро-сметка: 200002432817707

• Банка: Стопанска Банка – Скопје

• Примач: З.Г. „Брзовец“

• Цел на дознака (МНОГУ ВАЖНО): „Комуналии/Вода – за имот: [локација/куќен број/име на сопственик]“

Напомена: Задолжително наведете за кој имот се однесува плаќањето.

По уплатата, испратете слика од уплатницата на info@tresonce.mk за побрза евиденција.

Ажурирање на списокот и стари долгови

Во нашата евиденција постојат имоти за кои сопствениците не ги подмириле своите обврски, најчесто затоа што немаме контакт информации за да ги известиме или да им доставиме сметка. Не сакаме да веруваме дека некој намерно одбива да придонесе за селото.

Со цел да ја подобриме комуникацијата и навременото информирање, во тек е ревидирање и ажурирање на евиденцијата со уплати, така да во периодот кој следи ќе биде истакнат информативен список на должници, за да може имотите да се препознаат и сопствениците (или нивни блиски лица/соседи) да ни достават точен контакт, со што ќе можеме директно да ги контактираме и известуваме.

Важно појаснување

Износите на придонесите не беа корегирани од воспоставувањето на водоводот, а истиот во континуитет активно се одржува за да остане функционален и безбеден за користење.

Сите собрани средства се користат исклучиво за потребите на селото Тресонче. Здружението работи на волонтерска основа, а секој денар се враќа назад преку одржување на инфраструктурата која инаку би останала запоставена.

Ви благодариме на разбирањето и на поддршката!

З.Г. Брзовец – Тресонче

Одлуката за подигнување на смет: