Министерството за земјоделство, шумарство и водостопанство (МЗШВ) ја информира јавноста дека од 1 јули 2025 година стапува во сила целосна забрана за движење во сите шуми и шумски подрачја низ територијата на Република Северна Македонија. Забраната ќе трае до 31 август 2025 година, како дел од мерките за заштита од шумски пожари во текот на летниот, високо ризичен период.

Оваа одлука е донесена врз основа на насоките од Владата и по барање на ЈП „Национални шуми“ и Националните паркови, како управувачи со шумските ресурси и заштитените природни подрачја. Причината за ваквата одлука е зголемената опасност од настанување и ширење на пожари на отворен простор, особено во услови на високи температури, суша и засилен ветер.

Министерството напоменува дека движење низ шумите ќе биде дозволено исклучиво со претходно писмено одобрение, издадено од страна на подружниците на ЈП „Национални шуми“ или од соодветниот Национален парк, во зависност од тоа кој управува со конкретното подрачје. Сите други посети, вклучувајќи рекреативни прошетки, собирање на шумски плодови или планинарење, се строго забранети во наведениот период.

Секое непочитување на оваа забрана се смета за прекршок согласно член 106 од Законот за шумите, и ќе биде санкционирано со парична казна од 1.500 до 2.000 евра во денарска противвредност за физички лица кои ќе бидат затекнати во шума или шумско земјиште без дозвола.

МЗШВ упатува апел до сите граѓани да покажат свест и одговорност, да ги почитуваат воведените мерки и да придонесат во заштитата на шумите – еден од највредните природни ресурси на нашата земја. Само со заеднички ангажман можеме да го намалиме ризикот од катастрофални последици кои може да ги предизвикаат шумските пожари.