Утрово околу 4 часот и 55 минути силен земјотрес го стресе Тресонче. Според првичните информации од сеизмолошките станици земјотресот бил со јачина од 5,5 степени по рихтеровата скала, со епицентар во Леуново, на длабочина од 10 километри.

Земјотресот е почувствуван и во Дебар, Лазарополе, Тетово, Скопје и други градови во Македонија, како и во делови од Албанија.

Уште два земјотреси се регистрирани изминативе неколку часа, по силниот потрес утринава со интензитет од 5,5 според Рихтер.

Првиот со јачина 3.8 беше регистриран околу 12 часот напладне, со епицентар на 15.8 километри северноисточно од Тресонче со длабочина на 10 километри.

И вториот околу 13 часот и 26 минути, 3.7 степени според Рихтер, исто така со епицентар во мавровското подрачје, односно на 16 километри североисточно од селото, на длабочина од 2 километри.

Последниот посилен земјотрес регистриран околу 15 часот и 30 минути, со јачина од 4,9 степени по рихтеровата скала предизвика одрон од околу 200 кубни метри камен кој се урна на коловозот на патниот правец Дебар-Маврово кај Долно Косоврасти. Одронот настана дваесетина минути по последниот земјотрес.

Во вечерните часови екипите на Македонија Пат го отстранија одронот.

Ова беше еден од серијата земјотреси што го затресе западниот дел од земјава. Најсилниот беше во 4.54 наутро со јачина од 5 степени по Рихтер и епицентар во Леуново. Сеизмолошките станици во текот на денот регистрираа над 7 други потреси со јачина меѓу 2,7 и 4,9 степени.

Од нашиот дописник од Тресонче добивме информација дека не се констатирани поголеми екстерни оштетувања на објектите во Тресонче, освен кекои поситни како по некој оштетен оџак и сл. што не би можело да се каже и за внатрешниот дел каде што би било пожелно секој сопственик одделно да си го провери својот објект како би добил увид во фактичката состојба, а посебно да се обрне внимание на евентуалните промени во кровната конструкција, и тоа час поскоро, со цел навремено интервенирање и санирање во пресрет на зимата.

Околу состојбата на патот сеуште немаме конкретни информации кои сме во исчекување да ги добиеме од страна на нашиот дописник во текот на вечерта а најдоцна до следното утро, за што ќе бидете веднаш известени.

Обновено 12.11.2020

Од нашиот известувач добивме информација дека патниот правец Тресонче – Б. Мост е потполно прооден, и  дека не се констатирани одрони и други нарушувања на безбедноста на истиот.