Годината која измина зад себе остави бројни настани и творби значајни за нашето село и неговите посетители. Година која ке ја паметиме по бројните успешни проекти, спортски, културни, културолошки настани и манифестации предводени и реализирани од претприемачкиот дух и иновативни идеи на членовите на извршниот одбор на ЗГ Брзовец, селскиот одбор и месната задруга, со, се разбира голема помош од останатите посетители и сопственици на викенд куќи во Тресонче. 

Во собирањето на впечатоци ке направиме краток осврт кон дел од споменатите проекти и настани и тоа:

-Се остварија бројни работни средби со претставници од општината Маврово и Ростуше и градоначалникот Медат Куртовски, НП Маврово и др. од кои добивме значителна логистичка и финансиска подршка како расчистување на пристапните патишта, изградба на летниковци, директна финансиска интервенција во буџетот со која беше потпомогнато реализирање на претходно споменатите активности.

• 

  Расчистување на пристапни патишта

• 

  Расчистување на пристапни патишта

• 

  Работна средба во општината со г-дин Медат Куртовски

• 

  Изградба и дообработка на летниковци

• 

  Посета на водопадите н Тресонечка

• 

  Изградба и дообработка на летниковци

-Подигнат е меморијален центар „Дичо Зограф“ во кругот на црквата Св. апостоли Петар и Павле за чија цел беше изградена спомен чешма и обновена работната одаја. Обновена е оградата на црквата, санирана е камбанаријата и ѕидот крај истата, инсталирано е соодветно рефлекторско осветлување.

-Организирана беше културна манифестација за чествување и отварање на меморијалниот центар по повод 200 години од раѓањето на Дичо Зограф. На наше големо задоволство присуствуваа голем број на Тресончани, добронамерници, лица од државниот врв, амбасадори, претставници од МПЦ како и еминентни личности од научната и уметничката фела. Настанот доби и огромна медиумска покриеност во бројни печатени и дигитални медиуми како и во престижната МИА..

-Одржана е спортска манифестација во планинско трчање „Бистра Trail Run 2019“ и трката во планински велосипедизам ХЦО МТБ „Меморијал Дичо Зограф”, организирана од „В.К. Енерџи”од Скопје и „З.Г. Брзовец”, под покровителство на „ТРИГЛАВ Осигурување”. И за оваа трка беа доделени медали и награди на најдобрите.

Прогласување на победници од ХЦО МТБ „Меморијал Дичо Зограф”

-Само ден потоа се одржа и традиционалната Бистра АндреналинскаТура со стандардните тури по Бистра – „Bistra Adventure 2019“ во организација на „Прв до Врв“ од Скопје (голема тура по падините на Бистра, мала тура до Гари и Лазарополе, мала тура до Галичник)

-По повод двестегодишнината од раѓањето на Дичо Зограф (1819-2019) во Ликовниот салон на Македонската академија на науките и уметностите беше отворена изложба на негови икони. Изложбата ја отвори претседателот на МАНУ, академик Таки Фити, г.г. Стефан, архиепископ охридски и македонски и на Јустинијана Прима, и Сашо Цветковски, научен советник од истражувачкиот центар за културно наследство „Цветан Грозданов“ при МАНУ.

-Свеченото одбележување заврши со парастос во храмот „Св. Петар и Павле“ Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, еромонахот Ефросиниј, свештеникот Ѓорѓи Блажевски и ероѓаконот Анатолиј. На Парастосот присуствуваа и учесниците на Симпозиумот.

-Во два наврата претставници од ЗГ Брзовец гостуваа и имаа свое излагање во програми на јавните гласила, и тоа еднаш на радио и еднаш на телевизија.

-Пред крајот на годината делегација од општина Маврово и Ростуше предводена од градоначалникот Медат Куртовски и претставници од НП Маврово ги посетија водопадите на Тресонечка река и пештера Алилица како дел од проектот за промоција на истите со инвестирање во поголема пристапност до истите со градење на мостови, одморалишта, како и изведување на пристап до м.в. Син Вир.

-Во пресрет на зимата извршени се интервенции врз пристапните асвалтни патишта за санирање и тоа на неколку критични локации, и е извршена дренажа на проточната вода која создаваше голомразици во зимските периоди.

Со господ напред, за следниот период се предвидени исто така доста активности, како спортски настани и други манифестации. Од капиталните проекти може да се издвојат обнова и ревитализација на училиштето „Димитар Ормански“ како и задружната зграда, отварање на гранап и угостителски објект со сместувачки капацитети, овозможување на пристоен пристап до некои од културните и природни знаменитости како што е изградба на пристапен мост до пештерата Алилица и пристап до мв Синвир како и стојалишта и одмаралишта. Се планира учество во чествување на 1000 години од постоење на манастир Јован Бигорски, организирање на културни и забавни манефеста по одредени поводи и др.